Karangahan Vol. XIII Setyembre 2009

Author: Jai Jesus Uy Borlagdan /

KRISTIAN SENDON CORDERO

Balangaw


Dai pa nagpapahiling an balangaw.

Dai pa natitiyan an tubig.

Dai pa nabibisto an mga gadan.

May namiminwit nin mga pangum-um,

naghaharabunan nin mga tamong.

Mantang an langit toninong, pasaro-saro

sa pagsabwag kan mga bitoon. Naghihimasi

an aki kan itinugon na bagas sa sainda.

Sa saiyang pagsapugay napahiling

an mga gapo. Pighahali niya ini na garo

mga kuto. Nakasablay an mga basang

gubing. Malalatom an mga kolor.

Nagpupuon nang magkakan an tagiptip

buda takla. Toninong an mga gripo.

Naglulungsi an mga omboy. Naaalang

an mga ngabil. Narumarom an paghiling.

Nagbabados nin pan’os. Naglalabar sa gilid

an mga ikos. Signos kan paabot pang uranon.

Maogayon na Diyos, lulunton mo na daw

an kinaban, tutunawon an balangaw?

Anong dulot an boot? Bulawan na kararaw?

Anong klaseng pantyong an marokyaw

kan saimong banal na ngaran? Anong tubig

an mabonyag sa mga butod na hawak?





Sumagang

Tanganing dai mag-uran

magkurit nin saldang.

Tanganing dai magkitkilat

magtanom nin sundang.

Ngonyan na mga panahon

mayong untok an uran

asin pigtatakla na an mga sundang.

Kun magsubang an saldang

nanggugurot, nampupugot.

Nakangurot na a’ngog an daga.

Dangan an tubig-uran sa bulod

minahilig na sa banwa: may laboy,

gapo asin basod kaiba an baha

nananaklot, nananaklot

an bagong aswang

minsan igwang saldang!


Diit na sana an dai pa nakakamidbid kay KRISTIAN SENDON CORDERO, sarong ganador sa mga patiribayan sa pagsurat sa Bikol buda bilog na Pilipinas, arog kan Premio Tomas Arejola, Don Carlos Palanca Awards buda Maningning Miclat. Nagkapira sa mga libro niya iyo an "Mga Tulang Tulala", "Santigwar" buda "Pusuanon." Saro man siyang paraturo sa Ateneo de Naga University.